DESCANSU... Y ÚLTIMES TRÉS FECHES NEL 2008

SKAMA LA REDE va vivir agora unes selmanes de descansu anantes d'afrontar los trés últimos conciertos del 2008. Van ser en setiembre nel Festival Puelles Rock (Puelles - Asturies), n'ochobre nos Alcuentros Tradicionales de Treblogu (Uviéu - Asturies) y en payares nel Festival Castañazo Rock (Chantada - Galiza). El grupu nun va facer mas actuaciones no que queda d'añu qu'estes trés yá programaes.

Tamién nunes selmanes esperamos poder anunciavos quien va ser el gaiteru que sustituya de forma definitiva a Kike.

Un saludu y vémonos nos escenarios!

DERRAME08

CAMBIU D'HORA NEL SALCEDO ROCK

SKAMA LA REDE va actuar finalmente a les 22.30h, xusto anantes de Boikot

ÚLTIMOS CONCIERTOS DE KIKE CON SKAMA LA REDE

Los conciertos d'esti sábadu nel Salcedo Rock (Cantabria) y el domingu en Xixón (Asturies) van ser los últimos de Kike como gaiteru de SKAMA LA REDE, que decide dexar el grupu depués de 5 años de compromisu, trabayu y amistá.

La xente de SKAMA LA REDE queremos da-y les gracies a Kike pol enfotu n'esti proyectu y face-y saber que siempre va tener les puertes abiertes pa tolo que quiera.

LLEGA'L DERRAME

15/07/08SKAMA LA REDE va tar por tercer añu de siguío tocando nel Festival Derrame Rock en Pravia (Asturies). Será esti vienres 18 de xunetu a les 17:35 hores.

Pa mas información sobre'l festival: www.festivalderramerock.com

Amás, el xueves, Míguel va participar nel "Tributu a Dixebra" xunto a la veterana banda asturiana y otros cantantes de grupos del país-

CONCIERTU EN CANDÁS

17/06/08 Xunta Deeps y Zero Zone vamos tar actuando esti sábadu 21 de xunu nel Parque Santarua de Candás. La entrada ye llibre y con esti conciertu va conmemorase'l Día Europeu de la Música

JOSÍN N'ASTURIES

13/06/08 El nuestru Josín ta pasando unes selmanes n'Asturies de vacaciones. Por ello, anunciámosvos que va tar presente nos prósimos conciertos de SKAMA LA REDE enriba del escenariu compartiendo los vientos con Fer

VAMOS PA ERROMO

03/06/08 Esti sábadu 7 de xunu'l Gaztetxe d'Itzubaltzeta va acoyer la cuarta edición de la Folixa Asturiana n'Euskal Herria. Los actos van entamar cola llegada de la delegación asturiana a les 12:30 hores pa siguir con un pasucais. La xinta popular va ser a les 15:30 hores, pa depués facer otru gaitapoteo y entamar el conciertu a les 20:15. SKAMA LA REDE, K-Nalón y Chalaneru Sound System van ser los encargados de da-y remate a la xornada.

ENTREVISTA Y CONCIERTU

15/05/08 Míguel y Sergio van acudir hoi a Televisión Local Xixón pa participar nel magazine "Ya es hora" a les 10 de la nueche. Y el sábadu, en Cue, SKAMA LA REDE tien un nuevu conciertu, nesti casu xunta Felpeyu.

CHALANERU SOUND VA TOCAR NA FOLIXA ASTURIANA D'EUSKAL HERRIA

12/05/08 Por necesidaes del Gaztetxe d'Erromo la Folixa Asturiana treslládase al sábadu 7 de xunu y por problemes d'axenda Fala Non Caduca nun va poder actuar. Chalaneru Sound va ser el grupu que va acompañar a SKAMA LA REDE y K-Nalón. Nunos díes yá vamos poder comentavos los detalles del viaxe organizáu.

PRESENTACIÓN DEL FESTIVAL DERRAME ROCK

06/05/08 Esti xueves, Míguel va participar na rueda de prensa de presentación del cartel del Festival Derrame Rock. Va ser a la 1 de la tarde na sede de la SGAE n'Uviéu.

SKAMA LA REDE REPITE NEL FESTIVAL DERRAME ROCK

22/04/08 SKAMA LA REDE va convertise nel primer grupu que repite por tercer añu de siguío nel Festival Derrame Rock (col so formatu actual). El grupu va actuar el vienres 18 de xunetu nun horariu munchu mas afayaizu al d'años anteriores. Amás, Miguel va actuar tamién el día anterior nel conciertu "Tributu a Dixebra".

NUEVA XIRA, NUEVU TROMPETISTA

15/04/08 SKAMA LA REDE entama esti vienres n'Uviéu la so xira del 2008, que va llevalos per diferentes llugares d'Asturies, Galiza, Cantabria o Euskal Herria. El nome xenéricu pa esti añu ye "Ensin Josín somos un grupín", n'alcordanza del hasta agora trompetista del grupu que va unos meses abandonó la formación pa dir a trabayar a Canaries.

Nel so llugar, incorpórase Fer dende'l Conceyu de Villaviciosa. Fer va facer la so primer actuación con SKAMA LA REDE'l vienres 25 d'abril nel XX Conciertu pola Oficialidá de la Llingua Asturiana.

"TRIBUTU A DIXEBRA" NEL FESTIVAL DERRAME ROCK

12//04/08 El Festival Derrame Rock va abrir les sos puertes esti añu'l xueves 17 de xunetu con un "Tributu a Dixebra". Los dixebriegos van ufiertar un conciertu onde van participar miembros d'otros grupos asturianos. Entre ellos, Míguel de SKAMA LA REDE.

ENTREVISTA A SKAMA LA REDE

12//04/08 El portal d'intentet www.rocknmetal.com espublizó estos díes una entrevista con SKAMA LA REDE. Podéis lleela en: http://www.rocknmetal.com/index.php?categoryid=10&p2001_articleid=692

CON KOMA, DEF CON DOS Y SKACHA EN GALIZA

06/04/08 Va mes y mediu que vos anunciábemos la presencia de SKAMA LA REDE nel Festival Arreaocabo en Celeiro (Galiza). El Colectivo Chilindrín, organizador del eventu, yá tien zarráu'l cartel pal prósimu 5 de xunetu. Amás de los grupos yá anunciaos (SKAMA LA REDE, Def con Dos, Skacha y Rain is Art), incorpórense los navarros Koma y los gallegos Anger Second.

TAMOS DE VUELTA

01/04/08 Depués de tar casi un mes ensin actualizar por diferentes motivos, volvemos con tola información na nuestra páxina web. Pel momentu, na sección de conciertos yá podéis ver los grupos colos que vamos compartir escenariu nel XX Conciertu pola Oficialidá.

SKAMA LA REDE, FALA NON CADUCA Y K-NALÓN NA FOLIXA ASTURIANA N'EUSKAL HERRIA

06/03/08 El sábadu 31 de mayu, el Gaztetxe d'Itzubaltzeta (Erromo - Bizkaia) va acoyer, un añu más, la IV edición de la Folixa Asturiana n'Euskal Herria. A la yá confirmada presencia de SKAMA LA REDE, xúntense les de Fala Non Caduca y K-Nalón.

En prósimos díes, más información sobre'l restu d'actividaes y les inscripciones pal viaxe organizáu.

25 D'ABRIL, OTRA VEZ NOS ESCENARIOS

04/03/08 SKAMA LA REDE yá tien fecha pa volver a los escenarios y entamar asina la xira del 2008. Va ser el vienres 25 d'abril na primer xornada del Conciertu pola Oficialidá de la Llingua Asturiana qu'esti añu, al ser el so XX aniversariu, va celebrase en dos díes na Feria de Muestres de Xixón.

Hasta'l momentu, SKAMA LA REDE tien zarraes siete feches más. Cuatro n'Asturies (Cué, Uviéu, L.luarca y Puelles) y tres fuera (Euskal Herria, Galiza y Cantabria), anque son otres tantes les que tan pa confirmase d'equí a poco.

GANÓ AMON RA

01/03/08 "Caucasian rock" del grupu Amon Ra foi escoyíu ayeri como'l meyor cantar rock del 2007 de los Premios AMAS. SKAMA LA REDE foi finalista con "Echa a correr" nesa categoría pero nun hubo suerte.

La gala, finalmente, va ser retresmitida en diferíu por Localia'l llunes 10 de marzu a les 22 hores.

NUEVES CONFIRMACIONES DE CONCIERTOS

24/02/08 Un añu mas, SKAMA LA REDE va participar nel Conciertu pola Oficialidá de la Llingua Asturiana n'abril y na Folixa Asturiana n'Euskal Herria'l 31 de mayu. La fecha esacta del primeru d'ellos ta por confirmar. Mas información na sección de conciertos.

PRIMERA FECHA EN GALIZA

20/02/08 Acabamos de zarrar la primer fecha del añu nel país vecín. El sábadu 5 de xunetu vamos actuar nel Festival Arreaocabo xunta Def con Dos y Skacha. Mas información na sección de conciertos.

PRIMER CARTEL ZARRÁU

18/02/08 Va unos díes anunciábemos les primeres feches pa esti añu. Agora podemos tamién confirmar los grupos que nos van acompañar nel Salcedo Rock (Salcedo de Piélagos - Cantabria), ente ellos va tar Boikot. Mas información na sección de conciertos.

"ECHA A CORRER" FINALISTA NOS PREMIOS AMAS

18/02/08 El cantar de SKAMA LA REDE "Echa a correr" ta seleccionáu como finalista de la categoría "meyor cantar de rock" de los Premios AMAS, que van entregase'l 29 de febreru nel Teatru Filarmónica d'Uviéu. El periodu de votación yá terminó, podéis consultar los finalistes de toles categoríes en www.premiosamas.com.

CARICATURA DE SKAMA LA REDE NEL NÚMBERU TRÉS DE "FECHU N'ASTURIES"

16/01/08 Yá podéis descargar el tercer númberu de "Fechu n'Asturies", el fancín del panorama musical alternativu asturianu. Ente los conteníos, amás d'una caricatura de los componentes de SKAMA LA REDE, destaquen les entrevistes a K-Nalón y Skontra y un repás de Xune Elipe a los grupos de rock n'asturianu de los últimos diez años.

La versión "en papel" del fancín podéis topala nos llugares avezaos y nos chigres que s'anuncien nel mesmu.

YÁ TA NA REDE'L VIDIO DEL CONCIERTU - DESPIDIDA DE JOSÍN

11/01/08 Una vegada más, Pablo Quiroga d'Algamar Producciones foi l'encargáu del trabayu que yá podéis ver nel nuestru MYSPACE.

"ECHAOS A LA MAR" ENTE LOS MEYORES DISCOS DEL ESTÁU

07/01/08 La páxina web del programa Derrame Rock, que s'emite nos 40 Principales d'Asturies yá fexo pública la so llista de los meyores discos del añu 2007. Ente los diez mas destacaos atópase "Echaos a la mar" de SKAMA LA REDE, que merez el siguiente comentariu: "Estamos en el año 2007 después de Cristo, toda Asturias está dominada por retrasados españolistas...¿Toda? No! En una sociedad carente de valores, con la palabra "ideales" al borde de la extinción, con la juventud asistiendo con indolencia a su autodestrucción y con cualquier idiota utilizando internet como púlpito, una aldea poblada por irreductibles nacionaliegos resiste ahora y siempre al invasor.
Siempre cerca de la realidad social asturiana descrita explícitamente con la rabia del luchador. Como si dos amigos, entre "cagondioses", se la contaran uno a otro en un chigre, como aquellos dos patriotas gabachos que Guy de Maupassant inmortalizaba en su cuento. Cruda y creíble".

TIERRA ASTUR O7" Y "¡SALÚ YA DIXEBRA! PERVERSIONES"

22/12/07 Dos nuevos discos onde apaez SKAMA LA REDE. "Tierra Astur 07" ye'l CD qu'acompaña al Anuariu de la Música Asturiana y onde participamos colos cantares "Echa a correr" y "La música nun va aparar" y que va distribuise de baldre col selmanariu Les Noticies ésti vienres 21 d'avientu.

D'otru llau, la selmana qu'entra entama la distribución de "¡Salú ya dixebra! Perversiones", el discu de versiones de Dixebra onde estrozamos "Da-yos caña".